“Hənd” və “bol”. Yəni hamımızın bildiyi - əllə və topla oynanılan həndbol idman növü... Bu iki anlayışı özündə birləşdirə bilməyən 17 yaşlı qadın həndbolçulardan ibarət millimiz Kosovoda tarix yazdı. Amma qara hərflərlə.

Komandamız Beynəlxalq Həndbol Federasiyasının Avropa zonası üzrə keçirdiyi turnirdə biabırçı məğlubiyyətlə üzləşdi. Komandamız yerli Kosovo komandasına 8:49 hesabı ilə uduzub. Rəqibin 49 dəqiq zərbəsinə vur-tut 8 qolla cavab vermək komandamızın vəziyyətindən xəbər verir. Fiziki cəhətdən 17 yaşlı kosovolulara yaxın belə durmayan həndbolçularımız “hənd”lərində “bol”ları saxlaya bilmədilər. Artıq qol vurmaqdan yorulan Kosovo yığması yubiley qoluna – yəni 50-ci dəqiq zərbəsinə çox yaxın olsa da, buna sadəcə saniyələr çatmadı.

Elə böyüklərdən ibarət millimizin də vəziyyəti ürəkaçan deyil. Avropa çempionatının seçmə mərhələsində mübarizəyə başlayan komandamıza əsl mübarizənin nə olduğunu şimali makedoniyalılar göstərdilər. Komandamız üçün “40 mərasimi” təşkil edən makedoniyalılar qapımızdan 40 top keçirib, 17-sini buraxdılar.

Möhkəm olun, əziz həndbolçular! Axı sizi oktyabrın 14-də daha güclü İspaniya komandası ilə oyun gözləyir...

Qulammirzə Səfərli
Bakusport.az