Ötən əsrin sonlarında daha da məşhurlaşan idman növlərindən biri də badmintondur. Təsadüfi deyil ki, badminton məhz 1992-ci ildən olimpiya idman növü hesab olunur. İnsan sağlamlığı üçün vacib və təhlükəsiz idman növlərindən sayılan badminton həmçinin idmançılara və izləyicilərə əyləncə də vəd edir.

Bu yazıda fərqli mövzudan danışacağam - məqalənin adından göründüyü kimi fiziki məhdudiyyətli şəxslərin badminton sevdasından…

Ulu Öndər Heydər Əliyev və Azərbaycan Respublikasının Prezidenti İlham Əliyevin dediyi kimi Azərbaycan daima dünyada idman ölkəsi kimi tanınır. Futbol, güləş, cüdo, gimnastika, boks, voleybol, döyüş növlərində kifayət qədər tanınmış idmançılar və xeyli nəticələrimiz var. Gün gələcək, bu siyahıya badmintonu da əlavə edəcəm. İnanıram ki, o gün çox uzaqda deyil. 2021-ci il dekabrın 8-də Taleh Ziyadovun Azərbaycan Badminton Federasiyasının ümumi yığıncağının növbədənkənar konfransında federasiyanın prezidenti seçilməsindən sonra bu sahədə atılan addımlar gələcəkdə badmintonun daha kütləvi hal alacağının işartısıdır.

Mövzudan uzaqlaşmadan bildirmək istəyirəm ki, məhz bu il – 2022-ci ildə badmintonun ikişafı naminə görülən işlər həmçinin fiziki məhdudiyyətli dostlarımızın da ürəyincədir.

Gəlin, xatırlayaq: 29 mart… Bu tarixi badminton aləmində xüsusi qeyd etmək olar. Çünki Azərbaycan Badminton Federasiyası məhz bu tarixdə DOST İnklüziv İnkişaf Yaradıcılıq Mərkəzi ilə əməkdaşlıq görüşü keçirdi. Görüşün məqsədi aztəminatlı ailələr, şəhid və qazi övladlarına idman sahəsində inkişaf etməyə köməklik göstərmək, professional badmintonçular yetişdirmək, fiziki məhdudiyyətli şəxsləri isə parabadminton növündə kəşf etmək, hakimlər yetişdirərək onları işlə təmin etmək oldu. Parabadmintonçular… Badmintonumuzun bir parası… Onların bu sevilən idman növünə marağının mükafatı olaraq federasiyanın DOST İnklüziv İnkişaf Yaradıcılıq Mərkəzi ilə birgə bu addımını insanlıq adına böyük bir addım kimi qiymətlndirmək olar. Həm insanlıq, həm də idman baxımından…

Azmı eşidib, görmüşük fiziki məhdudiyyətli idmançılarımızın ölkəmizin bayrağını beynəlxalq arenalarda dalğalandırdığını?! Ayağı olmayanın himnimiz səslənən zaman ayaq üstə qalxmaq arzusu… Əli olmayanın bayrağımızı əli ilə yüksəklərə qaldırmaq arzusu… Gözü görməyən idmançımızın himni eşidərkən bayrağımıza qürurla baxmaq arzusu… Bütün bunların fonunda daima fiziki məhdudiyyətli idmançılarımız yetərincə nailiyyətlər, qələbələr, kuboklar və medallar qazanıblar.

İndi isə növbə bizim badmintonçularındır. Ölkəmizdə müəyyən qədər tanınan və sevilən bu idman növündə fiziki məhdudiyyətli idmançılar da öz sözünü deməyə başlayırlar. Təbii ki, bu, mərhələli şəkildə həyata keçiriləcək. Elə parabadmintonçu İbrahim Əliyev də fikrimi belə təsdiqlədi: “Azərbaycan Badminton Federasiyasının sayəsində geniş zalda məşq edirik. Bizi badminton avadanlıqları ilə təmin edirlər. Hətta beynəlxalq yarışlara qatılanda da, orada bütün xərcimizi federasiya qarşılaşır. Ümumiyyətlə, badmintona sevgim uşaq yaşlarından başlayıb. Mən balacaydım, 286 saylı məktəbdə oxuyurdum. O vaxt badminton yenicə inkişaf etməyə başlamışdı. Bizi qeydiyyata aldılar. İlk məşqçim Elşən Həsənəliyevdir. Sonralar yarışlarda, respublika çempionatlarında mükafatçılar sırasına düşdüm. Beləcə badmintonla peşəkar şəkildə məşğul olmağa başladım. Fiziki məhdudiyyət bizim badminton oynamağınıza mane olmur. Bunu bacarmaq üçün sadəcə həqiqətən istəmək lazımdır”.

Parabadminton üzrə məşqçi Teymur Abbasov ölkəmizdə yeni yaranan bu növü təbliğ etdiklərini bildirdi: “Hələlik bizdə 1 parabadmintonçu var – İbrahim Əliyev. Hazırda onunla yarışlara hazırlaşırıq. Paralimpiya komitəsilə birlikdə yaradılan bu növ üzrə təbliğatı daha da genişləndirməyi düşünürük. Beynəlxalq yarışlarda tək idmançı ilə təmsil olunuruq. Amma bununla paralel DOST İnklüziv İnkişaf Yaradıcılıq Mərkəzi ilə birgə də fəaliyyət göstəririk. Orada əhalinin həsas qrupuna aid olan insanlarla da məşqlər keçirik, parabadmintonu təbliğ edirik. Bu növü Azərbaycanda inkişaf etdirmək üçün əlimizdən gələni edirik ki, həmin insanları cəmiyyətimizə inteqrasiya edək. Bu işin çətinliyi odur ki, fiziki məhdudiyyətli uşaqların valideynləri hər hansı bir səbəbdən uşaqlarını daha çox evdə saxlayır, cəmiyyətə qarışmağını istəmir. Bu da böyük çətinlik yaradır”.

Yadınızdadırsa, avqustun 2-də “Şən İnklüziv Badminton” layihəsinin rəsmi açılış mərasimi olmuşdu. DOST İnklüziv İnkişaf və Yaradıcılıq Mərkəzinin və Badminton Federasiyasının birgə layihəsi olan tədbirdə layihənin təqdimatı və fəaliyyət qaydaları haqqında məlumat verilmişdi. Proqram çərçivəsində benefisiarlar Badminton Milli Komandasının üzvlərinin və qonaqların vahid iştirakı ilə Problem Əsaslı Tədris metodları üzrə səmimiyyət və əməkdaşlıq məqsədli 5 interaktiv, inklüziv simulasiya fəaliyyətinə cəlb edilmişdi. Həmin tədris metodu inklüziv benefisiarların məntiqi düşüncə tərzinin inkişafına yönəlmişdi. Badmintonun hər kəsə əlçatanlığını göstərmək üçün tədbir iştirakçılarına Virtual Reallıq proqramı nümayiş etdirilmişdi. Proqram xüsusi səs effektləri və 3D görüntü vasitəsi ilə fiziki məhdudiyyətli iki inklüziv benefisiara öz həmkarları ilə virtual formada badminton oynamaq imkanı qazandırdı. Məhz bu addım da həssas qrupdan olan şəxslərin sosial adaptasiyası, onların bacarıqlarının üzə çıxarılmasına dəstək göstərməkdir. Belə addımlar da, fiziki məhdudiyyətli badmintonçuların cəmiyyətə inteqrasiyasında mühüm rol oynayır.

ŞÖHRƏT HÜSEYN