İtaliyanın Yezolo şəhərində keçirilən uşaq, yeniyetmə və gənclərin dünya çempionatında Azərbaycan kikboksçuları 20 medal qazanıb.

Bakusport.az xəbər verir ki, bunlardan 7-sı qızıl, 6-si gümüş, 7-si isə bürüncdür. Ölkəmizi yeniyetmə və gənclərdən ibarət millinin baş məşqçisi Hikmət Hacıyevin rəhbərliyi altında DİN İdman Cəmiyyəti, Dragon Fight Club, Ağcabədi Birlik, Şahdağ Quba İdman Klubu, ZV Fight, Xocalı Klubu, Abşeron İdman Klubu, Quba-Nicat İdman Klubundan 38 idmançı təmsil edib.

Nümayəndə heyətinin tərkibində Azərbaycan Kikboksinq Federasiyasının 1-ci vitse-prezidenti Ramal Aslanov, millinin köməkçi məşqçisi Mehman Quliyev, Telman Məhərrəmov, Eduard Məmmədov, Elnur Həmidov, Əliəsgər Soltanov da İtaliyaya yollanıb.

Kikboksinqin “Low kick” növündə Şükür Aslanlı (42 kq), Mahmud Hüseynov (57 kq), Nicat Ələkbərli (63,5 kq), Səfərəli Vəhədov (71 kq), Gülməmməd Səfərli (+81 kq), Elton Hüseynov (+91 kq) və “Full contactda” Murad Məmmədov (60 kq) bürünc medal qazanıblar.

“Low kick”də Rinat Qiyasov (45 kq), Renat Qiyaslı (51 kq), “Full contact”da Əli Cəfərli (54 kq) və “Kick light”də Kənan Cəfərli (57 kq) finalda uduzaraq gümüş medalla kifayətləniblər.

Azərbaycan millisi bundan əvvəl 6 qızıl medala sahib olub. Belə ki, yeniyetmə və gənc dünya çempionlarımız K1-də Murad Gəncəliyev (45 kq), Rafiq Babazadə (48 kq), “Low kick”də Sübhan Məmmədov (45 kq), Ramal Zeynallı (48 kq), Elvin Məmmədov (54 kq) və “Kick light”də Nizami Əliyev (32 kq) fəxri kürsünün ən yüksək pilləsində qərarlaşıblar.

Turnirin son günündə komandamız daha 3 final döyüşündə qüvvəsini sınayıb. Amin Quliyev qızıl, Vüqar Məmmədov və Akif Quluzadə gümüş medal qazanıb. 

Yeniyetmə və gənclərdən ibarət millinin baş məşqçisi Hikmət Hacıyev nəticəni yüksək dəyərləndirib: "Bütün bu uğurlar əziyyətli və gərgin keçən məşqlərin nəticəsidir. Biz komanda şəklində uğura köklənmişdik. İnandıq və bacardıq. Bundan sonra daima Azərbaycanın bayrağını beynəlxalq arenalarda dalğalandıracağıq".

Azərbaycan Kikboksinq Federasiyasının 1-ci vitse-prezidenti Ramal Aslanov da qazanılan nailiyyətlərdən danışıb: "İdmançılarımız dünya çempionatında heç kimdən çəkinmədiklərini göstərdilər. Bir yarışda 20 medal qazanmaq hər ölkəyə qismət olmur. Bunu biz bacardıq. Bütün kikboksinq ailəsini təbrik edir, qələbəmizi şəhidlərimizə həsr edirik".

Qeyd edək ki, ötən il Monteneqroda keçirilmiş yeniyetmə və gənclərin Avropa çempionatında Azərbaycan millisi 17 medal (5 qızıl, 5 gümüş və 7 bürünc) qazanmışdı.